Kom ons wees nou maar eerlik: Ons dink aan kos en seks, en hoe ons oor onsself voel meer as een maal per dag – en ons is deurgaans intens bewus van ons lyf en hoe ons vir ander rondom ons lyk . . .

Die kos wat ons eet (of dalk nie eet nie) en wat ons ervarings van ons maat tussen die lakens is, maak ’n belangrike aspek van ons fisiese en as ons emosionele gesondheid en sekuriteit in die verhouding uit.
Volg hierdie paar praktiese wenke om jou energievlakke die hoogtes te laat inskiet, en sit weer harmonie en ritme terug in jou sekslewe!

Selfondersoek

Gee aandag aan hoeveel tyd jy alleen, in stilte, en buite deurbring – gee aandag aan jou fisiese aktiwiteite in die dag, kom in ’n goeie roetine met jou slaappatroon, en bowenal, beplan jou etes vooruit om ‘ou’ gewoontes en slegte patrone te beperk.

Gesondheidsflaters wat ons gereeld begaan wat energie tap en libido verlaag:

i. Gekonsentreerde vrugtesappe en gaskoeldranke (diet, lite en zero ingesluit).
ii. Melk- en suiwelprodukte (chroniese inflammasie, met chroniese moegheid en vogretensie).
iii. Kunsmatige versoeters (neurotoksiese substanse wat jou brein vinniger laat verroes en wat kanker kan veroorsaak).
iv. Geprosesseerde en verfynde kosse (Duimreël: indien dit verpak, geseël of geblik is, vermy dit).
v. Kaffeïenbelaaide drankies (dit maak jou byniere gedaan en put baie waardevolle voedingsreserwes uit).

Superkosse waarvan jou parskuipe moet oorloop:

i. Vars vrugte: Appels, piesangs, granate, vye, gevriesde bessies, avokadopere, papajas, pomelo’s.
ii. Vars groente: Broccoli, Brusselse spruite, spinasie, seldery, tamaties, wortels, lensies, swartbone/aartappels.
iii. Grane: Koring, bruinrys, basmati-rys, volgraan- en saadrolletjies, hawer- en volgraanontbytkos, volgraanpasta.
iv. Vleisproteïene: Laevetbeesvleis (insluitend maalvleis en biltong), wildsvleis, kalkoen, volstruis, hoender.
v. Vis-proteïene: Salm, sardientjies, tuna en makriel.
vi. Ander: Eiers, tofu, oesters, beeslewer, hummus, quinoa, grondboontjiebotter.
vii. Neute: Amandel, okkerneute, pimperneute (pistachio-neute).
viii. Sade: Pampoen, sesame.
ix. Koeldranke: Tuisgemaakte (vars) granaat-, lemoen-, pomelo-, wortel- of beetsap (dieselfde hoeveelheid as wat jy normaalweg tydens ’n ete sou nuttig).
x. Kruie en speserye: Borrie, gemmer, swart peper, rissies, knoffel, ’n volledige reeks vars en gedroogde groen speserye, heuning en rooibosbessiesous (cranberry).
xi. Slaaisous en asyne: Balsamiese asyn, suurlemoensap, extra virgin olyfolie, avokado-peer- en canola-olie, rooiwyn.

Groentee: 3 – 4 koppies versprei deur die dag.
Water: 2 liter per dag.
Superpeusel: 35 g neute of 25 g goji-bessies.
Op die teetrollie in die slaapkamer: Rooibos-, gemmer- of kamilletee (Chamomile), organiese heuning – 1 teelepel in tee voordat jy slaap, donker sjokolade – beperk tot
1 blokkie saans.

’n Tipiese 7 dag-eetplan vir volgehoue energie

Ontbyt: 40 g volgraanontbytkos of hawer met 100ml afgeroomde melk en natuurlike versoeter (Xylitol, Stevia, Splenda).
Midoggend: ½ koppie mango- of papajablokkies, met 1 teelepel oplosbare vesel oorgestrooi.
Middagete: saadrolletjie, 120 g tuna/ sardientjies met 1 teelepel mayonaisse (lite).
Laatmiddag: ½ appel met 1 teelepel grondboontjiebotter.
Aandete: 2 vars oesters, 90 g salm, 90 g gestoomde groente, met 45 g basmati-rys.
Laataand: 1 vars wortel (groot) met 1 teelepel hummus of ½ vy met 1 blokkie donker sjokolade (70%).

Alternatiewe opsies vir midoggend en laataand: ’n klein piesang, of 3 selderye met 1 teelepel grondboontjiebotter.

Alternatiewe opsies vir middagete: 100 g vetvrye biltong en 5 groot aarbeie of ¼ koppie gevriesde bessies of soeshi (6 Kaliforniese rolletjies) – beperk soeshi tot slegs twee maal per week.

Seks is nie net ’n belangrike liggaamsfunksie nie, dit is ook ’n genotvolle een. Soos jou ouderdom toeneem, styg jou streshormoon (kortisol) se vlak geleidelik en daal jou libido. Verlies aan seksuele behoeftes kan egter ook ’n oorsaak van ’n hormoonwanbalans, angs/depressie, die newe-effekte van chroniese medikasie, of bloot net ’n groot, voorkombare kommunikasiegaping wees. Jysal jou in die langtermyn daarby baat vind om te luister na wat jou maat herhaaldelik as pêrels langs die pad laat val, of dalk so in die verbygaan aan jou noem … want jy sal weldra ontdek dat hoe aandagtiger jy luister, hoe meer hoor jy, en hoe meer jy hoor, hoe nouer word die band tussen julle, en hoe nouer die band tussen julle, hoe groter die beloning!

Ligte vermaak in die slaapkamer vir optimale genot

Praktiese wenke wat jou metabolisme versnel, jou brein se chemie herstel, jou libido verhoog en jou orgasme se intensiteit laat toeneem:

Kegeloefeninge: Jou pubies-coccigieuse spiere (PC-spiere) is jou pelvisvloerspiere wat tydens orgasme ritmies saamtrek en wat jou in staat stel om tydens urinering midstroom op te hou en te knyp.
Versterk hulle met gereelde saamtrekoefeninge regdeur die dag: in die kar op pad werk toe, in die verkeer, op jou kantoorstoel, ensovoorts – en gebruik dit dan in die bed om jou ervaring te verhoog.

Strekke: 5 tot 10 minute se stadige strekoefeninge is ’n fisiese aktiwiteit wat jou metabolisme versnel en endorfiene afskei wat jou seksuele aanwakkering verskerp.

Plankoefening: Aktiveer al jou groot kernspiergroepe in jou romp. Lê op jou maag; jou elmboë 90° gebuig; voorarms plat op die grond met jou handpalms na onder. Balanseer jouself tussen jou voetsole en voorarms terwyl jy jou boud-, rug- en maagspiere saamtrek. Doen drie stelle van 20 sekondes met 30 sekondes rus. Pas nou al drie hierdie tegnieke in die bed toe om jou ervaring en orgasme na nuwe vlakke te neem!

Artikel deur Dr. Wian Stander